Turismu

Dâ Wikipedia, la nciclupidìa lìbbira.
Jump to navigation Jump to search
Lu mari rapprisenta una di li pussibilità dunni jiri 'n vacanza

Lu Turismu è dda attivitati ca cunzisti ntô fattu di viaggiari pi visitari, duranti lu tempu lìbbiru, lochi e citati diversi di chiddi unni nurmarmenti si campa. La palora Turismu servi puru p'idintificari lu cumplessu di li turisti prisenti nta na ditirminata lucalitati, ntôn particulari pirìudu. Lu turista scegghi li lochi di li sò viaggi pî mutivi cchiù diversi: di caràttiri naturali, culturali, artìsticu, gastronòmicu, spurtivu, ecc.

Nta lu 2004, ntô munnu, li pirsuni ca viaggiaru pi turismu di variu tipu, niscennu di lu propiu paisi, foru 760 miliuna. Chistu fu nu nùmmiru assai granni c'addimustra comu lu turismu è n'attivitati ca cuntìnua a crìsciri ogni annu (deci anni fa foru sulu 545 miliuna). Li riggiuni di lu munnu ca hannu avutu la cchiù granni crìscita di turisti hannu statu chiddi di l'Asia e dû Pacìficu, unni hannu jutu nnô 2004 lu duppiu di pirsuni chi jeru nnô 1995. A lu secùnnu postu di li zoni unni lu turismu sta criscennu cchiossai, c'è lu Mediu Urienti.

Ma nta lu munnu la riggiuni cchiù visitata arresta l’Europa, ca vitti agghicari ntô 2004 414 miliuna di turisti, 16 miliuna cchiossai rispettu ô 2003. La nnustria dû turismu fa smòviri granni quantitati di danaru: ntô 2003 foru spinnuti cchiossai di 520 miliardi di dòllari. Li tudischi sunnu lu pòpulu ca spinnìu cchiossai nta lu 2003: 65 miliardi di dòllari pi viaggiari a l'èstiru; doppu di li tudischi ci sunnu li miricani, li ngrisi, li giappunisi, li francisi, li taliani (cu 20 miliardi) e li cinisi.